有準新郎班馬扮食飯準備求婚，但豪華飯局原來AA制，朋友見證後準新娘做醜人，翌日向大家追收飯錢，閨蜜唔順氣，在網上大爆飯腳的敢言回應。而留言的網民則幾乎一面倒力撐樓主，有人認為「事前無講就唔夾」；有人表明會照夾錢，但「不再相見」。詳情見下圖及下文：
班馬扮食飯準備求婚 飯局原來AA制 見證後準新娘追收飯錢逐張睇↓↓↓↓
樓主本月26日在社交平台Threads以「黐Ｘ線求婚叫朋友夾錢」為題發帖，稱「噚日我閨蜜個男朋友叫晒啲朋友，話買咗花同埋戒指，準備今晚求婚，叫我哋出嚟扮食飯，唔好同佢女朋友講，OK大家二話不說幾忙都應承出嚟食飯，食到咁上下佢就開始拎啲嘢出嚟求婚，成餐都好順利嘅」。
樓主續指「今日我閨蜜WhatsApp我叫我夾返噚晚餐飯錢，每人夾返$800左右，我知係佢男朋友叫嘅，比你哋會點做，唔夾怕之後面左左，夾又覺得唔順氣」。
相關閱讀：參加小朋友生日會後被追數$1140 港媽舉家出席兼送1千蚊賀禮：事後對方家長竟要求收費！
樓主強調真人真事
回應的網民好奇查問「其實係咪潮文，間唔中就一單劇情一樣嘅」，樓主回應表明「真人真事，噚日（25日）發生嘅」。另有人想知「其他共同朋友如何回應？？係咪全部都夾？？ 之後全部unfriend（不做朋友）！？ 」。樓主進一步透露，「有一大半人已俾咗錢，其中一個有話：你唔係咁都叫人夾嘛？但都俾咗錢，佢應該比得好唔gur（唔順氣）」。
還有人詢問「食咩飯要$800？」，樓主解畫「一間4星級左右嘅餐廳，啲嘢OK好食，但唔值$800囉」、「我望到張單Total（總數）約1萬幾，有叫酒但我無飲，（只係望咗一眼，唔肯定Exactly（實際）個數），所以唔知佢有無計埋紮花和蛋糕，除返條數應該都合理嘅」。
網民大都站樓主這邊
回應的網民大都站樓主這邊，有人表明唔夾錢，有人卻列出會夾錢的條件：「人情度扣返」、「事前無講就唔夾」、「夾餸算啦，夾咩錢」、
「呢啲朋友要斷捨離啦」、「可能被要求夾酒席錢」、「我會照夾錢，然後不再相見」、「我會夾，但不會出席之後婚宴（香港人要返工很忙呀）」、「唔緊要當做咗人情，佢哋結婚唔使去了！可以封鎖埋」。
相關閱讀：拍拖6年擬拉埋天窗 男方只肯影結婚相 港女一再退讓：淨搞觀禮 準新郎堅拒 絕情說出6個字……
另有不少力撐樓主的網民都願就事件作長文回應，講出心底話闡述看法：
•睇嚟你都幾大信任，你唔會諗下多種可能性。嘅然成婚姻，一個長久日日嘅枕邊人親啲，定係所謂閨蜜親啲！？枕邊人要一同生活、過老，閨蜜朋友各自最後有家庭，有重要嘅枕邊人。如果係以上嘅前題因素下，你無考慮過「扯貓尾」？真係佢男友叫？定係兩公婆有晒公識，閨蜜搵你就話男友叫就好，做醜人。呢種可能性有無？
•原來我並不孤單，我好多年前又係有個friend（朋友）係咁。我覺得咪當自己食咗餐唔好食嘅飯囉。錢咪照俾嘅。肉酸係佢哋。再講有點樣嘅男朋友就會有點樣嘅女朋友。如果唔係同一類人，又點會開到口問你。真心呢種人疏遠佢啦。對自己好啲。你當人係交心，人哋轉個頭就笑你哋。
•認真，你當人閨蜜人哋有無當你係先？未婚夫同閨蜜識做嘅就應該唔收呢嚿錢，就算未婚夫提出，你閨蜜其實都可以拒絕佢㗎。唔係嗰800蚊嘅問題，而係條氣唔順，你都可以預想之後佢哋結婚，搵你做幫手嘅話，又要你出錢又要你出力啦，只會吃力不討好。
•你回應佢，唔該下次再求婚冇Budget（預算）就唔好揀咁貴嘅餐廳啦，你求婚唔係我呀，我老麥（快餐店）都得㗎，$800包埋人情啦，結婚當晚我出席唔到啊腳痛啊，你哋呢次結得開心啲，下次再結唔好搞我，俾咗$800要有排儲錢呀。
•$800買斷個朋友關係，抵！不過以防溝通上有誤會，我會好清楚話俾佢聽事前係冇講過要夾錢嘅，要夾錢我唔介意，戥你高興，下次麻煩你事前講聲大家好做。同埋，我唔會去飲囉。
•其實呢啲情況，你忍得一次，就會有第二次，久而久之，你都會忍唔到，結果都係冇朋友做。嘅然遲早都冇朋友做，咁就唔好浪費金錢、時間，同心機去維繫一段咁樣嘅友誼。
•黐線，要出埋錢幫佢求婚！要人幫手就預咗要請食飯嫁啦！無錢唔好學人揀啲貴地方求婚啦！男人無錢唔緊要，孤寒加計較，邊個嫁俾佢真係好Ｘ慘。
•錢照夾，但之後叫做姐妹／兄弟，就不了。不然隨時不止沒有裙／禮服，反過來要幫他們夾甚麼錢，而且是突然間才「通知」你付款。
•做咗場show（騷）點都要收返人工，霞姐都起碼有飯盒，仲有結婚就唔好做佢姊妹，陣間連姊妹裙都要自己俾錢買。
•但凡關結婚事嘅都係照妖鏡嚟，你朋友嘅真面目同你想像中係有出入的，唔好講得咁肯定。好好做心理準備吧。
•唔食都食咗，可以俾，但結婚嗰日成班真係唔好去，仲有一樣嘢，過數俾返佢男朋友，唔好直接過俾佢。
•夾唔夾錢應該一早講明，事後先話要夾好肉酸囉成件事。你哋全部人都唔好夾呀，扮唔記得過數。
•經過呢次之後，希望脆主（樓主）唔好答應做姊妹伴娘，唔係倒貼又勞氣嘅事接二連三咁發生。
•留言一面倒。證明大家都係正常人。我諗你都應該知點做，佢求婚做咩要你買單，就算想人俾錢都要事前講清楚啦，到時知道要俾錢都照去就係你情我願。
不過，亦有網民認為食飯AA制合理，弱弱地指「大鑊…..我覺得食飯要AA（制）有少少合理添」，但補充「$800係貴的」。
資料來源：kelly_lo_bb＠Threads
相關閱讀：港鐵婦與「非洲情人」Whatsapp對話瘋傳 「我想你來香港向我求婚！」網民：邊個騙邊個？↓↓↓↓
有網民搭港鐵，看到一名婦人低頭打Whatsapp，網民偷偷瞥到她疑正與「情人」對話，內容疑似電騙正在發生中，但「邊個騙邊個」引發網民熱議。
有網民2023年11月在連登討論區中，以「地鐵阿姐疑似中咗電騙」為題公開事件，該網民的偷拍行為雖備受網民批評，但其截圖卻成為討論焦點。以下是有關「傳情」對話的截圖，有網民從電話字頭，發現該女子的「情人」竟是來自非洲，從應對內容中，網民熱議騙與被騙的微妙關係↓↓↓↓
