香港的夏天炎熱又潮濕，洗頭對於香港人而言是每日必做的事，但如何洗才是正確的洗頭方式？我們又該怎樣正確選擇洗髮護髮產品？今集《星級大搜查》搜查一吓藝人明星們的洗頭及護髮習慣，並找來皮膚科專科醫生陳厚毅講解正確的洗頭方式及保養頭髮方法。
謝君豪每日洗頭：唔洗似雀巢
《星級大搜查》訪問多位藝人，發現他們洗頭習慣各有不同。呂爵安（Edan）表示自己每天洗頭：「如果唔洗會覺得瞓覺好似好污糟，或者唔舒服。（我洗得）好快手，3、4分鐘洗完。」姚焯菲根據季節決定洗頭頻率，她說：「夏天嚟講，我每一日都會洗頭，同埋有時工作要噴定型噴霧，我覺得（用咗）對頭髮唔好嘅（產品）就每一日都要洗。但係冬天比較乾燥，如果每日洗頭，其實對頭髮好差，所以我可能會keep住隔日洗，除非出汗。」
謝君豪則與Edan一樣每天洗頭，他說：「一定要洗咗先出門口，如果唔係就覺得自己成嚿嘢喺個頭，好似個雀巢咁塌晒，第二就係個人唔精神，朝早洗晒頭，精精神神出門咁就最好喇！」
相關閱讀：星級大搜查丨明星手機充電習慣曝真個性？郭柏妍一習慣顯焦慮個性 張振朗「借電」維生
明星洗頭習慣大不同？
呂爵安愛「低頭洗」：有地心吸力
至於洗頭方法，呂爵安表示自己是「低頭洗」：「習慣咗，因為細細個媽咪係咁樣幫我洗，所以我由細到大都係咁樣洗。我會覺得咁樣洗乾淨啲，有個地心吸力吸住啲頭髮，如果唔係好似洗極啲gel仲喺個頭度咁。」甄澤權則表示有獨門洗頭秘訣：「我洗頭用嘅水溫唔算太熱，偏凍少少，我唔會用好多洗頭水或者護髮素，可能用一個五毫（份量）就夠。」娟姐（練美娟）則表示：「千祈唔好洗太耐，如果洗得太耐的話，入面本身啲油脂、分泌物洗走晒的話，聽講會甩頭髮，所以唔需要洗得太乾淨，我唔知咁樣啱唔啱。」
相關閱讀：星級大搜查丨明星人生座右銘反映真實個性？金馬影后鍾雪瑩：唔死乜都得 劉德華「五字真言」成金句
方力申有防脫髮秘方？
不少藝人明星都習慣每天洗頭，但他們都表示，有聽聞每天洗頭或影響頭皮健康。方力申更質疑經常洗頭或容易引致脫髮，他說：「我有時去山區探訪，好多農民係唔洗頭㗎，但佢哋頭髮好濃密。我哋都市人成日洗頭，但點解我哋脫髮呢？呢樣嘢我真係唔明，好苦惱。究竟係我哋嘅水問題？我哋用嘅產品唔啱？定係其實人係唔應該成日洗頭呢？」
方力申分享，他是視乎情況決定是否每天洗頭，若連續兩天有工作，翌日一早要出席活動，他會在前一晚不洗頭。「我唔想聽朝去髮型屋set頭嘅時候，我呢個頭會留到去聽日，好似木乃伊咁瞓囉，唔郁咁樣瞓！」方力申直言已到要關注脫髮問題的年紀，甚至會找可令頭髮更堅韌及幫助生髮的偏方，而他亦有自己一套洗髮方式。他說：「唔好用太熱嘅水洗頭，聽講太熱又會傷頭皮，同埋我盡量唔會𢯎到頭皮入面，我真係覺得會唔會洗得多係會甩頭髮呢？」
相關閱讀：星級大搜查丨包包掛公仔成娛圈潮流指標 湯寶如爆男藝人儲公仔成狂：車埋衫畀公仔著
皮膚科專科醫生陳厚毅：最好暖水洗頭
皮膚科專科醫生陳厚毅表示，暫時沒有醫學實證證明「多洗頭易脫髮」的說法。陳說：「唔係洗得次數多就容易甩頭髮嘅，要睇佢洗頭嘅時候會唔會好大力喇，當然如果好大力嘅話，咁樣扯法，乜嘢頭髮都會甩，就緊係會脫髮啦！」至於洗頭一般應該洗多久，陳厚毅認為，一般每次洗頭5至10分鐘已足夠，「洗太耐不單止未必乾淨，反而頭皮有機會越洗越乾，因為油脂保護膜受損，變成濕疹更加痕癢。」他建議最好用暖水洗頭，太熱嘅水有機會溶咗個油脂保護膜，令頭皮越來越敏感。」
遇四種情況應每日洗頭
陳厚毅醫生建議四種情況，應該每日洗頭，他說：「如果係頭油好多、做完運動、本身又有用唔同頭髮產品，最好都係每一日洗，因為如果啲定型產品殘留咗喺頭髮，有機會引致毛囊炎，嚴重嘅話有機會脫髮。好似喺香港咁，夏天相當炎熱同潮濕，都係建議每日洗會比較合適。」
相關閱讀：星級大搜查丨新一代「明星街市」大公開 檔主爆陳山聰、陳煒專攻煲湯料 呢個街市外圍最易偶遇藝人
明星揀洗頭水各有心得
相比男士大多幾分鐘洗完一次頭，女士洗頭的步驟則較為繁複。留長髮的張蔓莎說：「我喺頭髮護理方面好detail，洗頭前我會用一啲精華油噴喺頭先，跟住再梳一梳 ，之後就洗頭，水溫唔可以太熱，護髮素我會搽咗一層先，跟住用埋護髮膜，我係非常之護理我嘅頭髮！」乾性髮質的姚焯菲則選用滋潤型洗髮用品；Edan選用清爽去油洗頭水，而胡子彤重視功能性，他說：「睇吓頭髮係咪會生得濃密啲。」謝君豪的選擇最隨心，他說：「我揀洗頭水有個原則嘅，就係見到有咩喺度我就攞嚟洗，如果冇洗頭水就用番梘洗。其實我唔知（洗頭水）有咩效用，總之我見到佢擺喺浴缸側邊，寫住洗頭水3個字，咁我就攞嚟洗㗎喇！」
相關閱讀：星級大搜查丨明星遇小人怎麼辦？ 193＠ERROR怒打Haters「小人頭」 直擊一蚊Joe鵝頸橋底打小人
頭皮敏感忌用含防腐劑及香料產品
陳厚毅醫生指，選用護髮產品要視乎頭皮的情況，頭皮敏感者應特別小心，他說：「盡量唔好揀啲常見嘅防腐劑，譬如Paraben（對羥基苯甲酸酯） 。另外就係會唔會有香料成份，如果頭皮容易敏感，用啲特別容易致敏嘅防腐劑同香料，有機會刺激頭皮，從而令洗完頭越嚟越痕。」至於是否用護髮素及髮尾油等，陳厚毅醫生提點：「 呢啲護髮產品基本上 都係可以用嘅，不過用法有唔同，有啲係（使用）時間上有啲唔同，有啲（使用）次數上唔同，睇清楚說明書去用就比較合適，盡量唔好掂到頭皮。」
相關閱讀：星級大搜查丨明星千奇百趣恐懼症 P1X3L成員有尖嘴恐懼 糖妹最驚一種聲音 醫生：屬於精神病
無矽洗頭水更健康？醫生：暫冇醫學實證
至於近年興起的無矽洗頭水，不少都標榜對頭皮更健康，有助防止毛孔堵塞、減少頭皮油脂分泌過多的問題等，陳厚毅醫生指：「暫時就冇充足醫學實證話無矽洗頭水比較好，亦冇話特別唔阻塞毛孔，不過而家好多無矽嘅洗頭水係冇問題嘅。」至於含矽的洗頭水，其實都有助修補頭髮角質層，陳厚毅醫生表示：「睇落去滑啲，唔會影響個毛囊嘅，令頭髮冇咁暗啞。」
