「還錢黨」肆虐，打出追債電話的騙徒似乎能講齊事主的個人資料，並在無厘頭下揚言已到對方屋企樓下追債$36618，以十萬火急的態度摧促即時回家與職員對文件，並恐嚇行動組會淋紅油，著令返屋企時小心啲云云。
有遇上騙徒的醒目女日前在網上公開事件教對付絕招，並坦言「真係嚇到眼淚都出埋」。但原來不少網民有類似經歷，也曾接過「還錢黨」的恐嚇來電，劇情也出奇地相似。詳情見下圖及下文：
「還錢黨」講齊個人資料 無厘頭屋企樓下追債 醒目女教對付絕招逐張睇↓↓↓↓
樓主講述「還錢黨」行騙經過
樓主本月13日下午在社交平台Threads，附上懷疑騙徒的手機號碼截圖發帖，長文講述懷疑「還錢黨」的行騙經過：
又嚟騙局⋯真係好Ｘ緊要。今日小妹1點幾收到個收數電話，都係純正廣東話，講得出我全名、身份證號碼同埋住址。話我爭$36618冇還而家喺屋企樓下，叫我即刻返屋企同佢哋啲人對文件。
我想仲有幾多萬？但因小妹一直都冇問人借錢，期期信用卡都清嘅，真係唔知佢講緊咩數，就問佢係邊間公司，乜嘢數，佢答我「我哋係金Ｘ資產有限公司，其餘你過嚟對文件咪得囉」 。
我話我返緊工，可唔可以wts（whatsapp）/email（電郵）俾我啲單？佢答「唔可以，因為啲文件係擺喺公文袋，一定要見到本人交收」，然後就話叫寫字樓打俾我。
1分鐘都冇佢個寫字樓就打電話俾我，又係報我全名身份證就叫我還筆數，我叫佢俾單俾我，佢答「你有冇借過財仔，我哋收數公司不嬲都係你俾咗錢先會俾單你」。
我話無單我一定唔會過數，佢答「咁你即係唔負責呢條數啦，我哋行動組會上嚟淋紅油，你自己返屋企小心啲，慢慢抹返啲紅油，同埋到時會有行政費要你自己孭返」。
我已經俾佢講到躁躁地，就話你威脅我你都要有單㗎，佢就已經爆晒粗口。Cut（切）咗線之後即刻去警署備案，後知後覺發現其實係詐騙。
但係都提吓大家，有咩事上嚟嗰下真係會驚，點都唔好急急地俾錢。最後小妹真係嚇到眼淚都出埋嚟。
相關閱讀：「親戚童黨」港鐵出沒 出一奇招搲飯食、討$2 港女俾錢後男童竟自認表弟
網民：有晒個人資料好恐怖
對於這類充滿惡意的騙案，有網民感嘆指「好恐怖，有晒個人資料」、我都試過，真係嚇到流馬尿」。
有人續指「正常俾我都會驚啦！但至少要問清楚咩事先，同埋肯定自己無欠人錢就更加理直氣壯去問咩事，佢答唔出嘅就即刻報警穩陣啲」、「收過兩次打嚟啲電話，真係會嚇親，但又要保持鎮定唔好俾佢大到，我一話報警處理佢就收線」。
過來人分享同款經歷
不少過來人深有同感，趁機講述自己的類似甚至同款經歷：
•假㗎，單單都話3萬幾。
•我噚日係收到呢兩個電話，同樣都係金Ｘ，一模一樣嘅case（案件）打嚟靠惡。
•我都試過俾人講中地址同名，一直寄信叫我還錢，心諗邊有借過錢。
•我都試過，又係身份證號都知，話欠幾千蚊未還，我問佢我欠邊個，佢話唔講得，如果唔還，上門追！打咗電話去警局備案！
•我都試過收到呢類電話，我亦都係叫對方俾單我睇咗先，最後cut線仲打嚟，我唔理直接收線。
•我都收過依啲電話，又話有我屋企地址，叫我落樓下等，我直接叫佢上嚟收，我現兜兜俾佢，佢又大我話上嚟就會搞我，我同佢講好呀，快啲上嚟，然後佢就cut咗線。
•我都試過幾次，又係講到我個人資料，我問佢邊間公司，我幾時點爭佢錢，佢答我係公司機密唔講得，之後我Ｘ到佢飛起，我唔知點解爭你錢但要我還，我叫佢約去警署門口等，我即刻還俾佢，佢淨係識係咁講粗口，又話我咁串，叫我出街小心啲，又係話淋我紅油！點知隔咗1年又打嚟，但係咁啱我已經搬走咗舊地址，我話又打嚟想呃X我，傻仔，我搬走咗啦，之後佢講完粗口就收咗線。
•試過騙徒用6字頭打嚟，知道晒我中文全名，要我還錢，嗰下著咗，大聲喝條友：你呢個電話號碼我記低咗，錄埋你音，我而家就去報警，條友即刻驚到話有事慢慢講，即刻收線冇咗打嚟，我跟手block（攔截）埋個電話號碼。
•同我係6月24收到電話故仔嘅一模一樣。不過佢好似冇講我身份證號碼，一開始佢講出我名同地址，我以為順豐送貨，傾落去之後同你一模一樣，之後係咁話已經有team（隊）人係我屋企出面，不過同時我開住cctv（天眼）睇屋門口係咪真係有人（當然冇人啦），但係最後佢冇咁直接講會上門淋紅油，佢淨係話咁你唔處理條數佢地team人就會做嘢㗎喇，臨近收線仲提我去五金鋪買定天拿水。
•有遇過，話會走上門收數，仲要知你個人資料，但係一問邊間收數公司就唔答，之後我就block咗了。
•之前遇過次一模一樣手法，無啦啦話我差人錢，問佢差邊個又唔講，話還咗俾張單我，我同佢講我宜家係屋企啊你上嚟收啦，又話我態度唔好又剩要搵人搞我，結果都係冇事。我之前見youtube（網上短片平台）有條女因為之前真係差太多人錢俾佢嚇到真係走去俾錢，結果就係還咗一次又要還其他費用變無底洞，最後還唔起仲要俾人淋紅油慘Ｘ到。
•我上星期都有收到同一個電話，後來同你一樣都係報咗警，警察覆我係詐騙。
•我老公都收到一模一樣嘅電話，之後去報案，喺警署見到又有其他人都因為咁嚟報案。
•我個fd（朋友）都試過，佢仲誇張啲，幾個人輪流wts佢又電話轟炸，係咁叫佢還錢，又sd（傳）淋紅油相嚇佢，佢即刻驚到喊，人哋叫佢去過數佢就想去，我問返佢，你有借過錢咩？無借過驚咩，仲要啲相擺明上網求其搵。但因為實在太滋擾，佢都係去咗警署報案，啲差佬同個收數佬講咪再打嚟。
相關閱讀：豪訂12人海鮮作餌 「生意黨」用一尷尬藉口慫恿訂酒圖呃錢 海鮮店一招識破詭計
網民講述對付電騙心得
另有人講述自己對付懷疑電騙的心得「佢大我唔到，我一般會接聽咗喂都唔講，由佢Ｘup完cut線」、「一見到唔識嘅電話打嚟，我只會喂一聲，然後任佢講嘢唔出聲唔應機，你出聲咪即係認咗啲資料係你嘅囉」。
於是有人表示，「所以喺香港，陌生電話一律唔聽，生活會輕鬆好多」、「現在唔識的電話一律不要聽，太累人，一個不小心就中伏，之後後續可能又太多問題」。
另有人提醒「真正嘅收數公司係唔會咁onＸ話淋你紅油嘅，你估如果你錄咗音佢哋會無事咩？ 假嘅會咁做，因為想嚇到你六神無主就過數俾佢」、「其實好易分別，呢啲一打電話來就將你嘅私人資料有幾多up（噏）幾多出嚟博你信任嘅九成係呃Ｘ人。喺呢個世代要有你嘅私人資料根本易過借火」。
資料來源：kensleyyu_0.0＠Threads
相關閱讀：騙子遇騙 電騙疑犯失手後即時反應原來係咁 一句對話慘遭秒殺 網民學起來：侮辱性極強↓↓↓↓
騙子遇騙，真是以其人之道還治其人之身。有電騙疑犯犯案時，慘遭對手一句對話秒殺，失手後的即時反應令人愕然。有見及此，網民加快把高招學起來，認為這句對話對騙子來說，殺傷力和侮辱性都極強↓↓↓↓
