有句老話——生意唔賺錢，邊個會做？聽落是否好有邏輯？常理判斷，亦應如此。不過，就小弟個人經驗及目睹的所有個案，發覺，原來做生意，真的是十做六七蝕，尤其新仔學人做生意又入咗一個毫無經驗的行業，幾乎是十做九蝕。
事實上，做生意與賺錢從來冇一個等號，大家咪傻吓傻吓將辛辛苦苦儲來的錢去博。記住，每一個行業都有不少「蛇」，專騙新手資金，尤其餐飲業，這個，已有無數藝人中招。
做生意蝕本，無知者是應該的。但若是坐擁百數十億資金的大集團，也一廂情願插進長蝕的生意，又卻是非常離奇。
我講乜？正是政府2019年之前，決定開展虛擬銀行業。
「虛擬」兩個字，好似好未來又好前衛。但事實，單單虛擬貨幣已不知爆出幾多騙案，令無數人血本無歸，屍橫遍野。至於虛擬銀行，也一開始就令投資者流血不止，不知何年何月才見家鄉。
金管局2019年開始陸續批出3批共8張虛擬銀行牌照，包括：（一）MOX Bank；（二）PAO Bank；（三）天星銀行；（四）螞蟻銀行；（五）富融銀行；（六）理慧銀行；（七）匯立銀行；（八）眾安銀行。8間銀行已營運5至6年，年年勁蝕，俗啲講，真係蝕到眼坦坦嗌阿媽，喊到收唔到聲。
改名無效 繼續失血
可能「虛擬」兩字給人太虛而不踏實感覺，於是去年10月開始，金管局將虛擬銀行改叫數字銀行。有用嗎？冇！八間大寶號繼續失血，單單去年已一共虧蝕26億4000萬元。
睇睇過去幾年的總虧蝕，更是驚人，過百億冇乜走雞。
小弟才疏學淺，當虛擬銀行推出時，我左睇右睇，也睇唔出佢哋個business model可以點生存而又有營利，也睇唔出市場有幾需要佢地。當然，我可能是「井底蛙」，故一直冇興趣參與這種虛擬運作，不存錢也不借錢，純旁觀，看看夠竟在搞乜鬼！
至今，5年了，若仍有人認為數字銀行是前景秀麗，值得再燒銀紙的話，是否需要搵醫生驗吓個腦呢吓？
