一名好心男子早前在元朗遇上懷疑「借錢黨」，對方揚言外婆入了瑪麗醫院室急症，但身上無現金，哭著求借300元趕赴探望。事主事後翻睇車Cam，驚揭原來「借錢黨」處心積慮，從片段中發現部署方略。
原來「借錢黨」在網民間已臭名遠播，不少人在留言欄寫下自己的中伏經歷，有人更加大爆這位懷疑「借錢黨」騙徒的底細，指演技勁好，有一樣嘢最叻。詳情見下圖及下文：
外婆睇急症哭借$300 好心男中伏後翻睇車Cam 驚揭元朗借錢黨早有部署逐張睇↓↓↓↓
相關閱讀：旺角迷暈黨疑雲以中獎獎券為餌？事主街頭遇「熟人」寒喧遇險 網民疑另有企圖
樓主：佢話自己唔係壞人
樓主本月12日在社交平台Threads以「錦上路」為題，上載懷疑「借錢黨」的相片，和一張7月12日凌晨3時許的車Cam照發帖，指「呢條友，噚晚凌晨3點幾，我入緊村泊好車喺我車隔籬Hi我，跟住喊晒口話佢阿婆入咗急症，瑪麗醫院，問我借$300，佢無現金，話自己唔係壞人，唔好當佢乞兒，佢話佢唔係。我叫佢轉數快俾返我，佢話喺台灣返嚟兩個禮拜咩都未整無轉數快。
佢話自己喺銅鑼灣做髮型師，留我電話同留咗個電話俾我，話聽日過嚟俾返我，我見佢好眉好貌，又無大陸口音，咁急，又喊晒口就借咗俾佢……」。
樓主續稱「今日打佢電話打唔通，我睇返車Cam，原來佢企喺大路邊跟住我入村。走上Group（群組）睇先知佢喺呢頭呃開人」。接著好心提醒「大家小心啲……噚晚佢喺錦上路近住石湖磄個路口出沒。#呃錢 #錦上路」。
心地好的樓主在回應欄補充「我啱啱收工返到去好攰諗唔到嘢，萬一佢真係佢真係見屋企人最後一面就俾咗佢……之後沖完涼諗諗下就先知中伏」、「啲人話佢成日凌晨出嚟搵食，之後去買毒品」。
相關閱讀：「神棍黨」屯門周街指點迷津 寫幸運號碼念經後即收錢 網民爆行蹤：九龍呢3處都有
苦主排隊鬧慣犯：佢演技好勁3秒內喊得出
回應的網民原來不少也是苦主，趁機講述自己的中伏經過，有人甚至形容這位疑似「借錢黨」的騙徒「演技好勁 ！3秒內喊得出」。
•左手帶住勞力士，夾住個LV成功包，我都中過伏；
•我中過 ！俾咗$200蚊佢 ，佢啲演技好勁 ！3秒內喊得出；
•原來而家轉咗場去錦田搵食，之前成日喺沙田呃人錢……；
•我都係，俾咗兩嚿水佢，銀包仲有$100人民幣都攞Ｘ埋；
•我以前都係住八鄉，樓主講嗰邊係真係有呢啲人出現嘅，特別係江夏圍嗰邊；
•我唔記得個樣，但我都喺錦上路夜晚晚俾人借咗百幾，又係話自己做Salon（髮廊）；
•佢慣犯嚟，成日呃的士搭，住江夏圍，一時又話阿婆撼穿頭要入院，一時又話阿婆跌親；
•我都遇過佢，佢話佢無現金搭車，我話幫佢Call（叫車）可以用app支付嘅車，佢又係都要現金，我話我有大陸微信，你過數俾我先，佢就話唔駛啦，謝謝。喺江夏圍。
•你講起呢樣嘢，我就一日喺沙田圍搭巴士嘅時候去走過來想喊想喊咁樣。可唔可以借佢$100？我話你攞張身份證俾我影低，跟住佢就走咗啦，見到呢幅相我都先諗起，佢啲屋企人成日都唔舒服。
•我都車過佢，好彩唔係遠錦上路去錦田西鐵站，驚死人唔知佢帶隻勞，係咁喺我面前樣，去到先話無錢要入去撳，20幾蚊都呃，跟住一去無回頭，隔咗一個星期又俾我見到佢，我話你上次20幾蚊未俾，跟住死死氣俾返我，我都算好彩。
•我都俾過呀，佢喊晒口呀，話問個個司機，人人都當佢乞衣咁。阿嫲有事入咗醫院，要即刻去搵佢，但銀包留咗喺公司，我同屋企人俾咗$500佢，佢再問可唔可以俾多$200，佢電話無錢打唔通，我哋見男人老狗喊到咁淒涼，都信以為真。
•我都遇過，又係我泊完車喺車場門口拍我，又係一樣對白，又話自己住乜乜花園，我叫佢去地鐵站搵警察幫你，跟住無理佢走咗，過咗幾日喺江夏圍村食飯，喺村口食煙又見到佢，之後我就跟住佢睇下佢去邊，見到佢行入村，條友住江夏圍村……
於是有網民感慨「橋唔怕舊，最緊要受」，並提醒「報警啦」。
資料來源：kitlun＠Threads
相關閱讀：「美女黨」透視裝襲油塘 街頭四出問男人索錢 街坊驅趕竟被囂張反擊↓↓↓↓
油塘街頭出現疑似透視裝「美女黨」，女成員晚上穿著一身性感喱士透視裝，四出向男途人索錢，有街坊拍片追擊驅趕，反被「美女黨」囂張反擊：「你沒有權力拍我！」。據拍片街坊表示，該女子「見男人就問男人攞錢」，已「攞咗五、六個」↓↓↓↓
